بلدیاتی انتخابات:سپریم کورٹ نےالیکشن کمیشن سےشیڈول مانگ لی

اسلام آباد : (جاگو پاکستان) سپریم کورٹ نے ملک بھر میں بلدیاتی انتخابات نہ ہونے کا نوٹس لیتے ہوئے الیکشن کمیشن آف پاکستان سے ایک ہفتے میں شیڈول طلب کرلیا۔

سپریم کورٹ آف پاکستان میں بلدیاتی انتخابات نہ کرانے سے متعلق کیس کی سماعت ہوئی۔ 

سماعت کے آغاز پر عدالت نے الیکشن کمیشن کے حکام کو مخاطب کرتے ہوئے پوچھا کہ بلدیاتی انتخابات کب ہوں گے؟، عوام کو جمہوریت سے کیوں محروم رکھا جا رہا ہے؟۔ اس موقع پر چیف الیکشن کمشنر سکندر سلطان راجہ کی تعیناتی کے بعد پہلی پیشی پر سخت سرزنش بھی کی گئی۔

جسٹس فائز عیسیٰ نے چیف الیکشن کمشنر سے کہا کہ آپ کا کام ہی صرف الیکشن کرانا ہے۔ آپ کا حکم عدالتوں سے بھی زیادہ طاقتور ہوگا لیکن آپ شاید آئین کے بجائے کہیں اور سے ہدایات لیتے ہیں۔ چیف الیکشن کمشنر نے کہا کہ پنجاب میں مدت مکمل ہونے سے پہلے بلدیاتی ادارے تحلیل کرنا غیرآئینی ہے، جس پر جسٹس فائز نے سوال کیا کہ غیر آئینی اقدام پر کیا کارروائی کی؟۔

عدالت نے آئین کے آرٹیکل 6 کا حوالہ دیتے ہوئے کہا کہ آئین پر عمل کرنے میں رکاوٹ ڈالنے والے سنگین غداری کے مرتکب ہوتے ہیں، جس پر سکندر سلطان نے کہا کہ 8 اپریل کو خيبرپختونخوا میں بلدیاتی الیکشن کرائیں گے۔ عدالت کا مشکور ہوں جنہوں نے معاملے کا نوٹس لیا، ہم نے بلدیاتی الیکشن کیلئے سنجیدہ کوششیں کی ہیں۔

چیف الیکشن کمشنر کے کرونا وبا کے دوران ضمنی الیکشن کرانے پر جسٹس فائز عیسیٰ نے ریمارکس دیئے کہ کیا اس احسان پر قوم آپ کو خراج تحسین پیش کرے؟۔ الیکشن کمیشن 2018 کے انتخابات کے بعد سے فارغ ہی تو بیٹھا ہوا ہے۔ عدالت نے الیکشن کمیشن سے پنجاب، سندھ اور بلوچستان میں انتخابات کا شیڈول اور چیف الیکشن کمشنر اور ممبران کی میٹنگ کے منٹس پر مشتمل رپورٹ طلب کرتے ہوئے سماعت 4 فروری تک ملتوی کردی۔